تابيعي ءوسىمى جوعارى, حالقى تىعىز ورنالاسقان وڭتۇستىك قازاقستان وبلىسىندا جاستارعا جۇمىس تابۋ وڭاي ەمەس. بۇل ورايدا مەملەكەتتىك باعدارلامالاردىڭ بەرەرى مول. مىسالى, وتكەن جىلى «ديپلوممەن اۋىلعا» باعدارلاماسى اياسىندا 900-دەن استام مامان اۋىلدىق جەرلەردە جۇمىسقا ورنالاستىرىلىپ, ونىڭ 303-ءى تۇرعىن ۇيمەن قامتاماسىز ەتىلگەن.
سونداي-اق, وتكەن جىلى جۇمىسقا ورنالاستىرىلعان 33 مىڭنان استام جاستىڭ 18,2 مىڭى اۋىلدا تۇرادى. وبلىستىق وتباسى, بالالار مەن جاستار ىستەرى جونىندەگى باسقارما باسشىسى بالمارجان ناربەكوۆا وڭىرلىك كوممۋنيكاتسيالار قىزمەتىندە وتكەن بريفينگتە «سەرپىن» باعدارلاماسى بويىنشا وڭتۇستىكتەن 7500-دەن استام جاس سولتۇستىك وڭىرلەردەگى وقۋ ورىندارىندا ءبىلىم الىپ جاتقانىن ءمالىم ەتتى. وسىلايشا جالپى رەسپۋبليكا كولەمىندە بولىنگەن 15 مىڭعا جۋىق گرانتتىڭ 50 پايىزدان استامىن وڭتۇستىك قازاقستان وبلىسىنىڭ جاستارى يەلەنگەن. «بۇگىنگى تاڭدا وبلىستا 750 مىڭنان استام جاس بار, بۇل ءوڭىر حالقىنىڭ 26 پايىزى. قازىر ايماقتا جاستارعا ارنالعان 57 قوعامدىق بىرلەستىك, 7 رەسپۋبليكالىق جاستار ۇيىمدارىنىڭ فيليالدارى مەن 20 ەتنومادەني ورتالىقتىڭ جانىنان جاستار قاناتتارى جۇمىس ىستەپ كەلەدى. سونىمەن قاتار, جوعارى وقۋ ورىندارى مەن كوللەدجدەردە - 41, ال كاسىپورىنداردا - 13 جاستار ءىسى كوميتەتتەرى بار. وندا 400 مىڭعا جۋىق جاس مۇشەلىك ەتەدى», - دەدى بالمارجان پولاتقىزى. سونىمەن قاتار, باسقارما باسشىسى وتكەن جىلى «جاسىل ەل» ەڭبەك جاساقتارىنا 1200-دەن استام جاس تارتىلعانىن, ستۋدەنتتىك قۇرىلىس وتريادتارىندا 500-گە جۋىق جاس ەڭبەك ەتكەنىن ايتىپ ءوتتى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى